Áhugi frá pólskum stórliðum á Ísaki Andra

Ísak er 22 ára kantmaður sem uppalinn er hjá Stjörnunni. Hann gekk í raðir Norrköping sumarið 2023. Á síðasta tímabili skoraði hann þrjú mörk og lagði upp sjö í sænsku úrvalsdeildinni þegar Norrköping féll úr deildinni.

Hann var lánaður til Viborg í Danmörku fyrri hluta árs en náði einungis að spila fjóra leiki vegna meiðsla. Hann sneri til baka á völlinn í síðasta mánuði og hefur komið við sögu í síðustu tveimur leikjum.

Norrköping er með tveggja stiga forystu á toppi sænsku B-deildarinnar þegar tímabilið er rétt rúmlega hálfnað. Eftir sigurinn gegn Helsingborg um helgina ræddi Ísak við staðarmiðilinn NT.

„Ég vil spila hér. Að koma inn og spila fyrir framan stuðningsmennina með þessum hópi, og við að leiða deildina – ég finn að eitthvað gott er að gerast í IFK," sagði Ísak sem er með einbeitinguna á að hjálpa Norrköping upp í úrvalsdeildina.

„Mér leið illa þegar við féllum í fyrra. Svo fór ég á lán, meiddist og hafði verið frá í fjóra mánuði fyrir leikinn gegn Landskrona. Það er svo gott að vera kominn aftur hingað og spila fótbolta fyrir framan þessa stuðningsmenn."

„Ég vil hjálpa félaginu að komast aftur upp í Allsvenskan. Það á heima í Allsvenskan, þetta er risastórt félag með frábæra aðdáendur," sagði Ísak Andri.