Tæplega 200 þúsund lesendur BBC tóku þátt í kosningu um besta markvörð úrvalsdeildarsögunnar. Tíu atkvæðahæstu markverðina má sjá hér fyrir neðan en til gamans má geta að fimm þeirra léku fyrir Manchester City á einhverjum tímapunkti ferilsins. Manchester United á þrjá markverði á listanum. Gary Lineker, Alan Shearer og Ian Wright ræddu niðurstöðurnar saman.
Peter Schmeichel (Man Utd) - 128 hrein lök í 310 leikjum. Fimm úrvalsdeildartitlar. Valinn besti markvörður Evrópu þrisvar. ,,Ég skoraði bara gegn Schmeichel í æfingaleikjum. Ég hataði hann innilega sem markvörð, hann er eini markvörðurinn sem ég var hræddur við," sagði Ian Wright.
Petr Cech (Chelsea) - 202 hrein lök í 443 leikjum. Fjórir úrvalsdeildartitlar. Tvisvar sinnum í liði ársins. ,,Petr Cech hélt hreinu í næstum öðrum hverjum úrvalsdeildarleik. Hann vann fjóra gullhanska, fjóra úrvalsdeildartitla, Meistaradeildina, fimm FA bikara, þrjá deildabikara, Evrópudeildina og var valinn besti knattspyrnumaður Tékklands níu sinnum," sagði Lineker.
Edwin van der Sar (Man Utd) - 132 hrein lök í 313 leikjum. Fjórir úrvalsdeildatitlar. Þrisvar sinnum í liði ársins. ,,Við tölum mikið um hvernig Alisson og Ederson hafa breytt markmannshlutverkinu. Van der Sar gat það líka, hann var góður á boltanum," sagði Shearer og bætti Lineker við: ,,Hann sannar mikilvægi þess að hafa góðan markvörð. Það tók Man Utd langan tíma að fylla í skarðið sem Schmeichel skildi eftir."
Athugasemdir