Diljá skoraði tvennu og Hlín hafði betur gegn systur sinni í Meistaradeildinni

Diljá var í byrjunarliði Brann sem lenti ekki í neinum vandræðum með Mitrovica frá Kósóvó.

Brann vann öruggan 5-0 sigur og skoraði Diljá tvö mörk í fyrri hálfleik. Hún fór af velli þegar rúmar tuttugu mínútur voru eftir.

Brann mætir gríska liðinu PAOK eftir þrjá daga og fer sigurvegarinn áfram í síðustu umferð forkeppninnar.

Hlín Eiríksdóttir og stöllur hennar í Malmö unnu Vålerenga, 1-0. Fanney Inga Birkisdóttir stóð í marki Vålerenga og Arna Eiríksdóttir var í vörninni.

Malmö mætir annað hvort Eintracht Frankfurt eða Omonia í næsta leik.

Guðrún Arnardóttir lék allan leikinn í vörn Hammarby sem vann Apolonia Fier örugglega, 4-0. Hammarby mætir Juventus eða Torreense.

Hafrún Rakel Halldórsdóttir kom inn af bekknum þegar Bröndby tapaði 2-0 fyrir Ajax.

Emelía Óskarsdóttir kom þá inn á í síðari hálfleik í 4-1 sigri Köge á Riga FC. Köge mætir Hearts í næsta leik.

Katla Tryggvadóttir var að lokum í byrjunarliði Fiorentina sem vann Cesena stórt, 6-0, í æfingaleik.