Fabio Vieira, leikmaður Porto, er besti leikmaður EM U21 árs landsliða en verðlaunin voru veitt eftir að Þýskaland vann úrslitaleikinn gegn Portúgal í kvöld. Lukas Nmecha var markahæstur með 4 mörk.
Vieira, sem er 21 árs gamall, var á bekknum í fyrsta leik portúgalska liðsins gegn Króatíu en kom inná og skoraði sigurmarkið á 68. mínútu.
Hann byrjaði alla leiki eftir það og var magnaður á miðjunni. Vieira skapaði urmul af færum og skoraði meðal annars sigurmarkið í undanúrslitum gegn Spánverjum.
Eftir að mótið kláraðist í kvöld var hann svo valinn besti leikmaður mótsins. Hann var ekki í stóru hlutverki hjá Porto á leiktíðinni sem var að klárast og kom yfirleitt af bekknum í leikjum liðsins en frammistaða hans á EM mun væntanlega auka áhuga erlendra liða.
Lukas Nmecha, framherji Manchester City á Englandi, var markahæstur með 4 mörk en hann gulltryggði þann titil með sigurmarkinu í úrslitaleiknum.
Samningur Nmecha við Man City rennur út á næsta ári en hann eyddi síðasta tímabili á láni hjá Anderlecht í Belgíu. Þar gerði hann 14 mörk í 31 deildarleik.
Athugasemdir