Rýnt í 100 milljóna króna leikinn - Hvar liggja styrkleikarnir?

Markvarslan: Fylkir
Ólafur Kristófer Helgason hefur fyrir löngu sannað sig sem frábær markvörður og í raun magnað að markvörður af hans gæðaflokki sé að spila annað árið í röð í Lengjudeildinni.

Þórhallur Ísak Guðmundsson, oftast kallaður Laddi, var valinn maður leiksins í báðum undanúrslitaleikjum Þróttar svo það er hart barist um þessa nafnbót. Það er þó spurning hvort að hann hefði átt að vera inn á í báðum leikjunum eftir brot sitt á Oumar Diouck.

Vörnin: Þróttur:
Það hefur farið undir radarinn að Þróttarar hafa verið með besta varnarlið Lengjudeildarinnar þetta árið. Liðið hefur aðeins fengið á sig 26 mörk í 24 leikjum. Sem gerir að meðaltali 1.09 mark í leik.

Leikmaður sem lið í efri deildum hafa fylgst vel með er Hlynur Þórhalsson, hafsent sem er fæddur árið 2005 og verið í stóru hlutverki í vörn Þróttara síðustu ár. Þá er Aron Snær Guðbjörnsson í banni hjá Fylki eftir að hafa fengið rauða spjaldið gegn HK.

Miðjan: Þróttur
Þróttarar taka þennan slag og geta stillt upp í ansi sterka miðju. Brynjar Gautur hefur heillað á tímabilinu og þá fengu þeir Kára Kristjánsson aftur snemma tímabils eftir stutt stopp hans hjá Fimleikafélaginu. Fyrirliðinn Baldur Hannes hefur sömuleiðis reynst Þrótturum vel.

Á miðju Fylkismanna eru þeir Guðfinnur Þór Leósson og Birkir Eyþórsson og er því reynslan meiri hjá Árbæingum. Tumi Fannar Gunnarsson er að upplagi miðjumaður en hefur leikið að undanförnu í bakverði. Ef einhver forföll verða getur Tumi fyllt í skarðið á miðjunni.

Sóknin: Þróttur
Eflaust erfiðasta valið. Sóknarlína beggja liða er stjörnum prýdd en Þróttarar hafa betur. Aron Snær Ingason er eflaust skærasta stjarnan í liði Þróttara og er hann sterklega orðaður við skref á Hlíðarenda eftir tímabil.

Sigurður Egill Lárusson hefur reynst Þrótturum frábær og sást það eflaust best þegar hann var frá vegna meiðsla. Örn Bragi Hinriksson er óvænta stjarna tímabilsins og Magnús Þórðarson hefur komið vel inn í liðið. Adam Árni Róbertsson var sóttur fyrir tímabil frá Grindavík en vegna meiðsla hefur hann komið minna við sögu en búist var við.

Þróttarar þurfa að hafa mestar gætur á Guðmundi Tyrfingssyni. Hann hefur skorað 15 mörk á tímabilinu og skoraði í báðum leikjunum gegn HK.

Magnús Daði Ottesen, sonur Sölva Geirs, er fæddur árið 2010 en Heimir Guðjónsson hefur engu að síður lagt traust sitt á hann. Theódór Ingi Óskarsson og Kári Sigfússon eru þá stórhættulegir á sitthvorum vængnum. Þá sakar ekki að hafa eitt stykki Eyþór Wöhler til að krydda upp á sóknarleikinn.

Þjálfarinn: Fylkir
Heimir Guðjónsson hefur vinningin yfir Sigurvin Ólafsson hér. Heimir þekkir Laugardalsvöll vel en vissulega aldrei stýrt liði við þessar aðstæður.

Sem þjálfari hefur Sigurvin einu sinni farið á Laugardalsvöll, þegar hann var aðstoðarmaður Eiðs Smára með FH. Þar tapaði FH naumlega gegn Víkingi í framlengdum leik.

Heimir er á sínu fyrsta tímabili með Fylki en Sigurvin er að klára þriðja tímabilið sitt í Laugardalnum.