5. deild: Skoraði sex mörk í risasigri

Smári tætti Uppsveitir í sig, 10-0, í 5. deild karla í Fagralundi í gær.

Smáramenn hafa farið mikinn í sumar og verið langbesta liðið í A-riðlinum, en staðan var þó aðeins 1-0 í hálfleik.

Allt fór hins vegar á flug í þeim síðari. Ýmir Halldórsson skoraði fjögur mörk á aðeins þrettán mínútum og gerði sig um leið gildandi í baráttunni um markakóngstitilinn.

Gunnar Breki Mýrdal Gunnarsson skoraði sitt annað mark á 69. mínútu áður en Ýmir bætti við sínu fimmta aðeins mínútu síðar.

Bjarni Harðarson gerði áttunda mark Smára á 77. mínútu og Ýmir kórónaði stórkostlegan leik sinn með sjötta markinu. Hilmir Vilberg Arnarsson kom liðinu síðan í tveggja stafa tölu undir lokin.

Smári trónir á toppi A-riðils með 31 stig, fimm stigum meira en næsta lið, og hefur skorað 52 mörk. Uppsveitir eru í næstneðsta sæti með níu stig.