Lengjudeild kvenna: Markalaust í toppslagnum - ÍA skoraði fjögur á Króknum

Grótta var með sex stiga forystu á toppnum fyrir leikinn en KR sat í öðru sæti.

Þetta var gullið tækifæri fyrir KR til að hleypa spennu í titilbaráttuna en hvorugu liðinu tókst að skora og markalaust jafntefli varð niðurstaðan.

Grótta er því áfram á toppnum með 29 stig. KRer í öðru sæti með 23 stig, þremur stigum á undan HK sem situr í því þriðja.

ÍA vann á meðan góðan 4-2 útisigur á Tindastóli á Sauðárkróksvelli.

Alexa Maletis skoraði tvö mörk á fimm mínútna kafla um miðjan fyrri hálfleikinn. Alliyah Monica Rowe bætti síðan þriðja markinu við á 38. mínútu.

Tindastóll vaknaði til lífsins í upphafi síðari hálfleiks. Rita Feist Lang og Cecilie Lillesoe Esbak Pedersen skoruðu með sjö mínútna millibili og minnkuðu muninn niður í eitt mark.

Skagakonur létu það ekki slá sig út af laginu og gerðu endanlega út um leikinn þegar um tuttugu mínútur voru eftir er Nadía Steinunn Elíasdóttir skoraði fjórða mark ÍA.

Flottur sigur hjá ÍA sem er í fjórða sæti með 18 stig. Tindastóll situr á botninum með aðeins þrjú stig og styttist óðfluga í að fall liðsins í 2. deild verði staðfest.

KR 0 - 0 Grótta

Tindastóll 2 - 4 ÍA
0-1 Alexa Maletis ('19 )
0-2 Alexa Maletis ('24 )
0-3 Alliyah Monica Rowe ('38 )
1-3 Rita Feist Lang ('51 )
2-3 Cecilie Lillesoe Esbak Pedersen ('58 )
2-4 Nadía Steinunn Elíasdóttir ('71 )