Sonný Lára hefur síðustu árin við fyrirliðinn í gríðarlega sterku liði Breiðabliks og verið hluti af íslenska landsliðinu ásamt því.

Hún var gestur í Heimavellinum á dögunum þar sem hún fór yfir feril sinn. Hún er að hugsa um að fara út þjálfun og var hún spurð út í það hvaða markverði sem hún sæi sem þá efnilegustu á landinu.

„Cecilía (Rán Rúnarsdóttir) á eftir að ná langt ef hún heldur rétt á spöðunum. Auður (Sveinbjörnsdóttir Scheving) hefur alla burði í það að vera góður markvörður," sagði Sonný.



„Svo má ekki gleyma Telmu (Ívarsdóttur) og Ástu (Vigdísi Guðlaugsdóttur). Það eru nokkrar þarna úti en við þurfum fleiri markverði. Það er bil núna; ég, Sandra og Gugga, og svo er langt í næstu."



Cecilía og Auður eru báðar mjög efnilegar. Cecilía spilaði með Fylki í Pepsi Max-deildinni í fyrra og Auður með ÍBV. Telma og Ásta eru aðeins eldri en þær eru báðar á mála hjá Breiðabliki og munu örugglega berjast um að taka stöðu Sonný í liðinu. Telma var á láni hjá FH í fyrra og Ásta á láni hjá Keflavík.

Sonný var spurð um hvaða ráð hún myndi gefa kollegum sínum. „ Maður þarf að geta gleymt mistökunum sem maður gerir, ekki hugsa um þau. Það er erfitt, sérstaklega ef þau kosta mikið og eru í stórum leikjum. Það getur verið mjög erfitt. Þetta er erfið staða og maður þarf að vera ákveðinn karakter til að 'meika' það þarna."

„Það er eitt ráð sem ég gef öllum og það er hafa gaman. Það kemur manni langt, að vera jákvæður."