Hákon Arnar Haraldsson, leikmaður íslenska landsliðsins, var fenginn í spjall fyrir landsliðsæfingu Íslands í Alabama í aðdraganda landsleiksins við Argentínu næstkomandi þriðjudag. Hann vonast til þess að fá að spila gegn Lionel Messi, einum besta leikmanni sögunnar, í leik liðanna á Jordan-Hare vellinum.
„Ég bara vona það. Það yrði ógeðslega gaman ef hann spilar og fá að spila á móti honum. Svo auðvitað nennir hann ekki að verjast, þannig það yrði mun auðveldara fyrir okkur að sækja en mun erfiðara að verjast. Ég vona að hann byrji,“ sagði Hákon aðspurður út í Messi.
Messi var ónotaður varamaður í síðasta vináttuleik Argentínu, gegn Hondúras í Texas síðasta laugardag. Í leik sem Argentína vann 2-0. Hann er sagður enn þá glíma við vöðvameiðsli í læri. Meiðsli sem hann varð fyrir í síðasta leik Inter Miami í maí.
Lionel Scaloni, þjálfari argentíska liðsins, hafði áður sagt að Messi gæti spilað einhverjar mínútur í síðustu tveimur æfingarleikjum liðsins fyrir mót. Leikurinn gegn Íslandi er einmitt síðasti leikur Argentínu fyrir HM.
Hákon segir íslenska liðið vel undirbúið fyrir leikinn gegn Argentínu, þrátt fyrir smá þreytu eftir langt ferðalag. Það ber þó að varast ýmislegt í leik Argentínu, sem hefur marga styrkleika.
„Þeir eru snöggir. Þeir keyra upp tempó-ið áður en þú veist af því, taka því rólega og eru svo allt í einu komnir [í sóknarleik]. Svo eru þeir með einstaklingsgæði og besta leikmann í heimi. Þannig þetta verður alvöru áskorun,“ sagði Hákon Arnar Haraldsson, leikmaður íslenska landsliðsins.
Viðtalið við Hákon í heild má sjá í spilaranum hér að ofan.
