Brynjar Björn sáttur: Við vorum betra liðið

„Ég er gríðarlega sáttur með frammistöðu alls liðsins. Við skoruðum gott 1-0 mark og fyrstu 30 mínúturnar vorum við betra liðið á vellinum. Við fórum aðeins aftar eftir fyrsta markið en komum vel út í seinni hálfleikinn. Þá skoruðum við frábært 2-0 mark eftir einstaklingsframtak og kláruðum leikinn. Það er alltaf viðkvæm staða að vera tveimur mörkum yfir en það var frábært að fá þriðja markið. Eftir það náðum við að láta leikinn deyja út.“

Leiknir hafði verið án sigurs í fimm leikjum fyrir viðureignina og var Brynjar spurður hvort sigurinn væri mikill léttir.

„Já, þetta er kærkomið. Við höfum spilað ágætlega en gefið of mikið af færum á okkur, sem við gerðum ekki í dag. Fylkismenn áttu erfitt með að skapa sér færi en við sköpuðum góð færi og skoruðum þrjú mörk. Við náðum þannig að snúa við þróuninni sem hefur verið síðustu leiki. Nú þurfum við að halda því áfram.“

Brynjar var spurður hvað hefði helst breyst frá síðustu leikjum.

„Við vorum betri sem heild, bæði varnarlega og sóknarlega. Við áttum góða kafla með boltann, bæði í uppspili og sóknarleik. Varnarlega vorum við þéttari og sóknarlega náðum við að skapa fleiri færi.“

Að lokum var Brynjar spurður hvernig Leikni hefði tekist að halda sóknarleik Fylkis niðri.

„Við náðum að vera þéttir varnarlega. Leikmenn röðuðust vel og við komum í veg fyrir að Fylkir skapaði sér mörg hættuleg færi. Þegar boltinn komst inn á hættusvæðin vörðumst við líka vel.“