Guardiola: Samt erum við ellefu stigum eftir þeim

Man City er í þriðja sæti sem stendur, ellefu stigum eftir toppliði Liverpool. Fimmtán umferðir eru búnar af leiktíðinni.

Guardiola segist ekki skilja hvers vegna stigamunurinn á liðunum sé svo mikill en Liverpool hefur verið að stela stigum á lokamínútum leikja í allt haust.

„Ég væri til í að vita ástæðuna fyrir þessum mikla stigamun á okkur og Liverpool," sagði Guardiola.

„Ein ástæðan eru gæðin sem andstæðingar okkar búa yfir, þeir hafa aðeins tapað einum leik af tæplega 60, það er ótrúlegt.

„Við erum langbesta liðið þegar það kemur að tölfræði yfir sköpuð færi og besta liðið í tölfræði yfir færi fengin á sig. Þar erum við mikið betri heldur en andstæðingar okkar.

„Samt erum við ellefu stigum eftir þeim."

Man City tekur á móti Manchester United í nágrannaslag í dag.