Örn mun sveima um leikvanginn þegar Ísland mætir Argentínu

Það er eftirvænting í Auburn í Alabama í Bandaríkjunum þar sem Ísland og Argentína mætast í vináttulandsleik sem hefst að íslenskum tíma klukkan 01:00 aðfaranótt miðvikudags.

Í Auburn eru menn mjög stoltir af því að þetta verði fyrsti knattspyrnuleikurinn (soccer) á Jordan-Hare leikvangnum, sem er heimavöllur Auburn Tigers háskólaliðsins í amerískum fótbolta. Hann tekur 88 þúsund manns í sæti og verður uppselt á leikinn, eða allt að því.

Heimsmeistarar Argentínu fá skiljanlega stærstan hluta athyglinnar enda síðasti leikur liðsins fyrir HM og útlit fyrir að Lionel Messi spili hluta leiksins.

Skallaörn, sem er vanur að sveima um á leikjum Auburn Tigers mun vera hluti af umgjörðinni í kringum landsleik Íslands og Argentínu og var hann að æfa flugið þegar fréttamannafundur var haldinn á vellinum á dögunum.