Brynjólfur fer vel af stað - Lærisveinar Freysa aftur á sigurbraut

Blikinn fór frábærlega af stað á síðasta tímabili og var valinn leikmaður ágústmánaðar áður en meiðsli settu strik í reikninginn.

Hann náði sér ekki almennilega á strik eftir áramót og skoraði ekki fleiri deildarmörk á tímabilinu. Brynjólfur virðist hins vegar staðráðinn í að finna sitt besta form á ný og gat varla beðið um betri byrjun.

Hann kom Groningen yfir strax á áttundu mínútu. Brynjólfur fékk boltann inn fyrir, hélt varnarmanninum frá sér og afgreiddi færið snyrtilega.

Hann kom boltanum aftur í netið á 34. mínútu en markið var dæmt af vegna rangstöðu. Brynjólfur fór af velli á 81. mínútu og Groningen vann leikinn, 2-1.

Jakob Gunnar Sigurðsson var einnig á skotskónum þegar Hilleröd tapaði 5-4 fyrir Vejle í ótrúlegum leik.

Jakob tók vel á móti löngum bolta úr vörninni og skoraði með skemmtilegri klippu. Þetta var fyrsta mark hans síðan hann kom til Hilleröd á láni frá Lyngby.

Hilleröd er enn án stiga og situr í næstneðsta sæti dönsku B-deildarinnar eftir þrjár umferðir.

Nóel Atli Arnórsson var í vörn Álaborgar sem gerði 1-1 jafntefli við Kolding. Álaborg er í þriðja sæti með sjö stig.

Daníel Tristan Guðjohnsen kom inn af bekknum hjá Malmö sem tapaði 2-1 fyrir Degerfors í sænsku úrvalsdeildinni. Malmö er í sjöunda sæti með 23 stig.

Freyr Alexandersson og lærisveinar hans í Rosenborg sneru aftur á sigurbraut með 2-0 útisigri á Lilleström.

Þetta var fjórði sigur Rosenborg undir stjórn Freys og er liðið komið upp í áttunda sæti norsku úrvalsdeildarinnar með 21 stig.