Thelma aftur á toppinn - Cecilía hélt hreinu

Thelma Karen Pálmadóttir var í byrjunarliði Häcken sem vann frábæran 4-1 sigur á Piteå.

Sigurinn skilaði Häcken á topp deildarinnar með 36 stig, tveimur meira en Hammarby, eftir þrettán umferðir.

Cecilía Rán Rúnarsdóttir stóð í marki Inter sem marði 1-0 sigur á Union Berlín í æfingaleik. Karólína Lea Vilhjálmsdóttir kom inn á þegar stundarfjórðungur var eftir.

Þetta var næstsíðasti æfingaleikur Inter áður en Seríu A-bikarinn hefst.

Glódís Perla Viggósdóttir lék í vörn Bayern München sem vann Paris FC, 2-0, í síðasta æfingaleik sumarsins.

Næst tekur alvaran við hjá Bayern sem mætir Wolfsburg í Ofurbikar Þýskalands eftir sex daga.

Emilía Kiær Ásgeirsdóttir var í liði Leipzig sem gerði 1-1 jafntefli við PEC Zwolle. Leipzig á tvo æfingaleiki eftir áður en þýska deildin hefst.