Jadon Sancho er ekki í erfiðleikum hjá Manchester United að sögn bakvarðarins Luke Shaw sem leikur með landa sínum hjá félaginu.
Sancho gekk í raðir Man Utd frá Borussia Dortmund í sumar og kostaði enska félagið 73 milljónir punda. Hann gerði fimm ára samning.
Sancho hefur ekki náð að sýna sitt rétta andlit á þessari leiktíð og hefur ekki skorað né lagt upp í fyrstu átta leikjunum.
Shaw hefur þó ekki misst neina trú og hefur bullandi trú á Sancho sem leggur sig mikið fram á æfingasvæðinu.
„Fyrir sumt fólk þá tekur þetta tíma. Ég myndi ekki segja að hann sé í erfiðleikum því ég sé það ekki eins og er. Hann er að leggja svo hart að sér á bakvið tjöldin,“ sagði Shaw.
„Hann æfir virkilega vel og virkar í góðu standi. Hann hefur ekki verið með þessa heppni sem þú þarft stundum fyrir fyrsta markið eða fyrstu stoðsendinguna. Ég efast ekki um að það sé á leiðinni.“
„Hann er með ótrúleg gæði, hann kemst beint á toppinn. Þetta snýst bara um að halda einbeitingunni og gera það sem hann er að gera á æfingum. Hans tími mun koma.“
Athugasemdir