Manor Solomon, leikmaður Shakhtar Donetsk, hefur staðfest að félög á Englandi séu að horfa til hans.
Lið á borð við Arsenal hafa verið orðuð við Solomon sem er aðeins 21 árs gamall og hefur gert frábæra hluti í Úkraínu.
Um er að ræða efnilegan framherja sem á að baki leiki í Meistaradeildinni með Shakhtar síðustu tvö árin.
Shakhtar keypti Solomon á sex milljónir evra en hann lék þá með liði Maccabi Petah Tikva í heimalandinu Ísrael.
„Það eru viðræður í gangi við lið á Englandi. Það eru hlutir sem gætu gerst í sumar," sagði Solomon.
„Draumurinn minn er að spila á Englandi og það virðist vera besti kosturinn fyrir mig. Lið á Englandi geta spilað fótbolta."
