Evrópubikarinn: Blikar fengu stóran skell í Svíþjóð

Það er óhætt að segja að einvígi Häcken og Breiðabliks í átta-liða úrslitum Evrópubikarsins sé lokið eftir fyrri leik liðanna í Svíþjóð í kvöld. Häcken var alltof stór biti fyrir Blika sem mættu í leikinn með mikið breytt lið og nýtt þjálfarateymi.

Blikar lögðu dönsku meistarana í Fortuna Hjörring í síðustu umferð en síðan þá hafa margir leikmenn yfirgefið Kópavogsfélagið og þá er nýtt þjálfarateymi komið inn. Ian Jeffs stýrði Blikum í fyrsta sinn í keppnisleik í kvöld.

Blikar náðu að halda aftur að Häcken í 25 mínútur en þá opnaðist allt. Þegar flautað var til hálfleiks var staðan 5-0 en Thelma Karen Pálmadóttir, sem var fengin til Häcken frá FH eftir síðasta tímabil, skoraði fimmta markið sem var hennar fyrsta mark fyrir sænska félagið. Fanney Inga Birkisdóttir var þá í marki Häcken í leiknum.

Í seinni hálfleik bætti Häcken við tveimur mörkum og þær fengu dauðafæri til að skora áttunda markið á 82. mínútu en Herdís Halla Guðbjartsdóttir, sem var í marki Blika í kvöld, varði þá vítaspyrnu.

Seinni leikurinn fer fram á Kópavogsvelli eftir viku, en það er vonandi að Blikar geti gefið meiri mótspyrnu þar.

Rebekka Sif kom inn á
Leikur Nordsjælland og Frankfurt í sömu keppni var einnig að klárast á sama tíma. Þar vann Frankfurt stórsigur, 4-0. Þegar um stundarfjórðungur var eftir af leiknum kom Rebekka Sif Brynjarsdóttir, sem uppalin er í Gróttu, inn á fyrir Nordsjælland. Hún er aðeins 16 ára og er afskaplega efnilegur leikmaður.