„Algjör skandall hvernig við fáum á okkur seinna markið“

„Þetta var leiðinlegur leikur. Boltinn var mikið í loftinu og við náðum ekki að eiga nógu vel við rokið. Við náðum ekki að stjórna boltanum og þar af leiðandi ekki leiknum“, sagði Sölvi.

Sölvi var sérstaklega ósáttur við hvernig liðið fékk á sig seinna markið.

„Fyrsta markið þeirra var fínt, góð fyrirgjöf og vel klárað. En seinna markið er náttúrulega algjör skandall. Við klikkum á boltanum og það endar með sjálfsmarki.“

Gylfi fékk hvíld
Gylfi var utan hóps í dag og Sölvi var spurður út í fjarveru hans.

„Það þarf að gefa manninum smá pásu. Hann er búinn að spila mikið undanfarnar vikur og átti skilið að fá hvíld og jafna sig á þessum meiðslum. Ég vona að hann spili næsta leik og ég býst við því að hann vilji það.“

Víkingar hafa þegar tryggt sér Íslandsmeistaratitilinn en eiga tvo leiki eftir. Sölvi lagði áherslu á að liðið ætlaði að klára tímabilið af krafti.

„Við viljum vinna alla leiki og það breytist ekki þótt við séum orðnir Íslandsmeistarar. Við viljum halda áfram að þróast sem lið.“

Viðtalið í heild sinni er hér fyrir ofan.