Ítalía: Markahæsti maður deildarinnar sá rautt fyrir ljótt brot

Como og Roma gerðu markalaust jafntefli í 6. umferð Seríu A á Ítalíu í dag. Gestirnir frá Róm léku manni færri mestallan síðari hálfleik eftir að Donyell Malen fékk beint rautt spjald.

Roma byrjaði betur og Paulo Dybala fékk færi í teignum eftir að Malen missti boltann frá sér. Skot Argentínumannsins var hins vegar slakt og fór beint á markvörð Como.

Lorenzo Pellegrini skaut síðan í stöng áður en heimamenn færðu sig upp á skaftið. Maxence Caqueret komst í ágætt færi en skaut framhjá.

Como-menn voru æfir undir lok fyrri hálfleiks þegar Wesley keyrði aftan í Assane Diao sem var að sleppa í gegn. Þeir vildu bæði aukaspyrnu og rautt spjald á brasilíska bakvörðinn en fengu hvorugt.

Roma varð síðan fyrir áfalli snemma í síðari hálfleik þegar Malen, markahæsti leikmaður liðsins á tímabilinu, fór illa í Kaiki. Dómarinn var ekki í vafa og sendi hann beint í sturtu.

Tíu Rómverjar héldu þó út og lítið var um tilþrif það sem eftir lifði leiks. Fyrsta markalausa jafntefli tímabilsins staðreynd, en Roma er í öðru sæti með 14 stig eftir sex leiki á meðan Como er í sjötta með ellefu stig.