Xabi Alonso.
Xabi Alonso er sá stjóri sem stuðningsmenn Liverpool vilja helst fá til að taka við af Jurgen Klopp í sumar. Klopp hefur tilkynnt að hann muni hætta með liðið eftir tímabilið.
Alonso var í uppáhaldi stuðningsmanna sem leikmaður Liverpool og skoraði í sigri liðsins í úrslitaleik Meistaradeildarinnar 2005. Stjóraferill hans fer vel af stað og Bayer Leverkusen er á toppi þýsku Bundesligunnar og í útsláttarkeppni Evrópudeildarinnar.
Í skoðanakönnun sem var á forsíðu Fótbolta.net, og um 8.500 manns tóku þátt í, sögðu 65% að Alonso væri besti kosturinn fyrir Liverpool.
En Alonso er að standa sig gríðarlega vel í spennandi verkefni í Þýskalandi. Það gæti reynst erfitt að ná í hann frá Leverkusen og segist Simon Rolfes, yfirmaður fótboltamála hjá félaginu, góðar líkur á því að Alonso stýri liðinu áfram. „Ein ástæðan er samningurinn. Önnur ástæða er að honum líður mjög vel. Hann er með gott lið hérna og við verðum áfram með frábært lið á næsta tímabili," segir Rolfes.
Ef Alonso vinnur þýsku úrvalsdeildina með Leverkusen, þá gæti hann freistast til að vera áfram en hann er samningsbundinn félaginu til 2026. En hvað gerir Liverpool ef Alonso er ekki fáanlegur í sumar.
Mirror tók saman fimm aðra kosti sem gætu tekið við starfinu af Klopp.
Pep Lijnders - Hefur getið af sér gott orð sem aðstoðarmaður Jurgen Klopp.
Roberto De Zerbi Ítali sem hefur heillað í starfi sínu hjá Brighton.
Ruben Amorim Ungur og efnilegur stjóri sem hefur unnið gott starf með Sporting í Portúgal.
Graham Potter - Hlutirnir gengu ekki upp hjá Chelsea en gæti verið tilbúinn í stórt félag núna.
Zinedine Zidane - Sigurvegari sem hefur verið orðaður við mörg störf eftir að hann hætti með Real Madrid árið 2021.
Athugasemdir
