Endurkoma Guðnýjar - Steini sáttur við formið

Guðný er komin aftur í landsliðshópinn eftir að hafa eignast barn í apríl sl. og er valin fyrir umspilsleikina gegn Portúgal. Guðný hefur fengið góðan spiltíma með sænska liðinu Kristianstad frá því að hún snéri aftur á völlinn.

„Guðný hefur litið vel út,“ sagði Þorsteinn á blaðamannafundi í dag þegar hann var spurður út í endurkomu hennar.

Hann sagði hana hafa spilað mikið og að endurkoman hefði gengið áfallalaust.

„Ég er bara mjög sáttur við formið á henni og spiltímann sem hún hefur verið að fá.“

Guðný kemur inn fyrir Emilíu Kiær Ásgeirsdóttur og er það eina breytingin frá síðasta landsliðshópi. Hún á að baki 43 A-landsleiki. 

Ísland mætir Portúgal á útivelli 1. desember og á Laugardalsvelli 5. desember. Sigurliðið tryggir sér sæti á HM í Brasilíu næsta sumar.