Steini treystir því að völlurinn verði góður í desember
Úrslit einvígis Íslands og Portúgals ráðast á Laugardalsvelli 5. desember.
Mynd: KSÍ
Úrslit einvígis Íslands og Portúgals ráðast á Laugardalsvelli 5. desember.
Mynd: KSÍ
Þorsteinn Halldórsson, landsliðsþjálfari kvenna, er bjartsýnn á að aðstæður á Laugardalsvelli verði góðar þegar Ísland tekur á móti Portúgal 5. desember í úrslitaeinvígi um sæti á HM.
Á blaðamannafundi í dag var Steini spurður út í það að svo mikilvægur heimaleikur væri á dagskrá í desember.
Hann vísaði til ráðstafana sem gerðar hefðu verið til að bæta aðstæður á vellinum og sagðist treysta því að völlurinn yrði góður. Allt yrði gert til að aðstæður yrðu sem bestar.
Hann tók þó fram að veðrið væri utan þeirra stjórnunar. Liðið þyrfti að undirbúa sig vel og vera tilbúið að takast á við þær aðstæður sem kæmu upp, bæði innan vallar og utan.
Fyrri leikur einvígisins fer fram í Portúgal 1. desember. Fjórum dögum síðar, laugardaginn 5. desember ræðst á Laugardalsvelli hvort íslenska kvennalandsliðið tryggi sér sæti á heimsmeistaramóti í fyrsta sinn.
