Landsliðið mætt í eina elstu borg Evrópu

Landsliðið flaug í gær frá Alicante þar sem fyrstu dagar undirbúningsins fyrir leikinn fóru fram. Ferðalagið gekk vel og í dag mun liðið æfa á keppnisvellinum auk þess sem Arnar Gunnlaugsson og Orri Steinn Óskarsson munu sitja fyrir svörum á fréttamannafundi.

Hristo Botev leikvangurinn í Plovdiv verður ansi tómlegur á morgun. Hann tekur tæplega 19 þúsund áhorfendur en búlgarskur fótbolti er í djúpum dal og mætingin á heimaleiki búlgarska landsliðsins hefur verið sorglega lítil.

Búlgarar voru arfadaprir á Laugardalsvelli í síðasta glugga, þar sem Ísland vann 3-0. En þeir sýndu mun betri leik gegn Lúxemborg. Landslið þjóðarinnar er í mikilli lægð en bráðabirgðaþjálfairnn Atanas Ribarski, þjálfari U19-landsliðsins, er enn með stjórnartaumana og klárar þessa riðlakeppni.

Ísland er ósigrað á toppi riðilsins og gæti tryggt sér sigur í riðlinum á morgun en Lúxemborg og Eistland mætast á sama tíma og strákarnir okkar leika gegn Búlgörum. Eftsa lið riðilsins mun tryggja sér sæti í B-deildinni en liðið sem endar í öðru sæti mun fara í umspil um að komast upp.