Lestu um leikinn: Þróttur R. 1 -  2 Breiðablik

Breiðablik er fyrsta liðið til að tryggja sér sæti í 8-liða úrslitum Mjólkurbikarsins eftir sigur á Þrótti í Laugardal í kvöld.

Leikurinn byrjaði nokkuð rólega en heimamenn voru þó líklegri. Blikar sóttu í sig veðrið þegar leið á fyrri hálfleikinn og Davíð Ingvarsson braut ísinn í blálokin.

Kristófer Ingi Kristinsson átti skot sem Þórhallur Ísak Guðmundsson í marki Þróttar varði út í teiginn. Davíð náði boltanum og skoraði með föstu skoti.

Ívar Örn Árnason, varnarmaður Blika, fékk gult spjald snemma í seinni hálfleik og var tekinn af velli stuttu síðar. Strax í kjölfarið fékk Viktor Örn Margeirsson rautt spjald fyrir ljótt brot á Erni Braga Hinrikssyni. Myndasyrpa af þeirri tæklingu er hér fyrir neðan.

Þrátt fyrir að vera manni færri bætti Kristófer Ingi við öðru marki Blika eftir laglegan undirbúning Ágústs Orra Þorsteinssonar.

Sigurður Egill Lárusson skoraði sárabótamark fyrir Þróttara í blálokin. Óli Valur Ómarsson var kærulaus í öftustu línu og Sigurður Egill náði boltanum af honum og skoraði með frábæru skoti rétt fyrir utan vítateiginn. Nær komust Þróttarar ekki og Breiðablik er komið áfram í 8-liða úrslit Mjólkurbikarsins.