Þór/KA vann sannfærandi sigur gegn Tindastól í A-deild Lengjubikars kvenna í Boganum á Akureyri í dag.

Þór/KA setti tóninn strax í leiknum og skoraði tvö mörk á fyrstu tveimur mínútum leiksins. Svo kom þriðja markið á 20. mínútu og róðurinn erfiður fyrir Tindastól.

Murielle Tiernan minnkaði þó muninn fyrir Stólana og var staðan 3-1 í leikhlé. Tindastóll komst hins vegar ekki nær. Þór/KA bætti við tveimur mörkum til viðbótar í síðari hálfleik. Gestirnir náðu aðeins að klóra í bakkann undir lokin og lokatölur 5-2. Þessi lið munu bæði spila í Pepsi Max-deildinni í sumar.

Þetta var fyrsti leikurinn hjá báðum liðum í Lengjubikarnum en það fór einn annar leikur fram í dag í Lengjubikar kvenna. Þróttur hafði betur gegn KR.