Ægir er komið áfram í 8-liða úrslit Mjólkurbikarsins eftir frábæran sigur á KA á Akureyri í dag. Fótbolti.net ræddi við Nenad Zivanovic, þjálfara Ægis, eftir leikinn.
Lestu um leikinn: KA 1 - 2 Ægir
„Þetta var mjög góður leikur hjá strákunum. Við erum vanir að vera í 8-liða úrslitum, KA sló okkur út árið 2022 á þessum velli, sá leikur fór 3-0 en við vorum í þeim leik. Nú komumst við áfram, þessi leikur var vel framkvæmdur hjá leikmönnunum. Ég bað þá um að skilja hjarta og sál eftir á vellinum, ef þeir gera það þá koma úrslitin," sagði Nenad.
Þetta var frábær sigur fyrir liðið en Ægir er án stiga í Lengjudeildinni eftir þrjár umferðir.
„Við höfum ekki unnið marga leiki í sumar og vetur. Töpuðum öllum leikjunum í Lengjubikarnum og höfum aðeins unnið Reyni Sandgerði og Árbæ, lið sem eru í deildum fyrir neðan okkur. Þetta er auðvitað besti leikurinn okkar og besta frammistaðan," sagði Nenad.
„Ég vona að þetta verði góð innspýting fyrir leikmennina. Það er mjög erfiður leikur gegn Vestra á sunnudaginn. Við höfum ekki marga daga í endurheimt. Leikmennirnir nýttu mikla orku í dag. Við höfum tvo daga og ég vona að við verðum á góðum stað fyrir leikinn gegn Vestra."
