Meistaradeildin: Barcola með þrennu í níu marka leik

Andoni Iraola leyfði sér að gera nokkrar breytingar á byrjunarliði Liverpool gegn LASK, sem er eitt af lakari liðum Meistaradeildarinnar.

Ungu leikmennirnir Trey Nyoni og Rio Ngumoha fengu tækifæri í byrjunarliðinu ásamt þeim Kostas Tsimikas og Jeremie Frimpong.

Það var nánast einstefna frá fyrstu mínútu. Florian Wirtz og Ngumoha voru mjög líflegir í byrjun og sköpuðu nokkrar hættulegar stöður, en það tók Liverpool rúmar tuttugu mínútur að brjóta ísinn.

Úrúgvæinn Ronald Araujo kom gestunum yfir með skalla eftir hornspyrnu Tsimikas. Þetta var fyrsta mark Araujo fyrir Liverpool, en hann hefur reynst ein bestu félagaskipti félagsins í sumarþ

Franski landsliðsmaðurinn Bradley Barcola hafði hvorki skorað né lagt upp mark síðan hann kom frá Paris Saint-Germain undir lok félagaskiptagluggans, en hann bætti heldur betur úr því í kvöld.

Barcola skoraði sitt fyrsta mark á 24. mínútu eftir frábæran undirbúning Ngumoha. Ungstirnið lék á hvern varnarmanninn á fætur öðrum og sveif nánast í gegnum vörn LASK áður en hann féll í teignum. Boltinn barst til Lewis Koumas sem lagði hann út á Barcola og Frakkinn skoraði af miklu öryggi.

Barcola var aftur á ferðinni á 37. mínútu þegar Wirtz fann hann inni í teignum og Frakkinn lét ekki segja sér það tvisvar. Annað mark hans og Liverpool komið í 3-0.

Þannig var staðan í hálfleik en það leið ekki á löngu þar til fjórða markið kom.

Jeremie Frimpong skoraði þá með skalla eftir frábæra fyrirgjöf Tsimikas. Frimpong, sem er einn af minnstu mönnum vallarins, náði að koma sér í rétta stöðu og stanga boltann í netið.

Iraola gerði tvær breytingar á vörninni á 62. mínútu þegar Virgil van Dijk og Joe Gomez komu inn á. Eftir það fór hins vegar að bera á kæruleysi í varnarleik Liverpool.

Robert Ljubicic, sem var nýkominn inn á hjá LASK, fékk boltann inni í teignum og skoraði. Van Dijk var með sinn mann en Gomez virtist illa staðsettur og heimamenn náðu að minnka muninn.

Liverpool var þó fljótt að svara og aðeins þremur mínútum síðar fullkomnaði Barcola þrennuna. Frimpong átti þá frábæra fyrirgjöf sem Frakkinn mætti á og kom boltanum í netið af stuttu færi.

Stórkostlegt kvöld hjá Barcola sem hafði loksins fundið markaskóna hjá Liverpool.

Koumas var síðan næstur á blað en hann hafði áður fengið tvö mörk dæmd af vegna rangstöðu. Í þetta sinn fékk markið að standa eftir að Frimpong átti enn eina frábæra sendingu inn á teiginn. Koumas tók vel á móti boltanum og renndi honum undir markvörð LASK.

Bakverðir Liverpool voru heldur betur að láta til sín taka í sóknarleiknum og sjötta mark gestanna orðið að veruleika.

Vandamálin í vörninni voru hins vegar ekki úr sögunni. Florian Flecker skoraði tvö mörk fyrir LASK með aðeins þriggja mínútna millibili og skyndilega voru heimamenn búnir að skora þrjú mörk gegn Liverpool.

Iraola verður eflaust ekki ánægður með þann hluta leiksins enda ansi kæruleysislegt hjá Liverpool að hleypa þremur mörkum inn gegn liði sem er talið eitt það slakasta í keppninni.

Sigurinn var þó aldrei í hættu og Liverpool fagnaði 6-3 sigri. Rauði herinn er því með fullt hús stiga eftir fyrstu tvær umferðirnar á meðan LASK er enn án stiga.

Feyenoord sneri leiknum við gegn Como

Á sama tíma vann Feyenoord góðan 3-2 sigur á lærisveinum Cesc Fabregas í Como.

Assane Diao kom ítölsku gestunum yfir á 18. mínútu en aðeins tveimur mínútum síðar jafnaði Gijvai Zechiel metin fyrir Feyenoord.

Anis Hadj Moussa kom síðan hollenska liðinu yfir á 52. mínútu og sneri þar með leiknum við.

Hadj Moussa hefur verið sterklega orðaður við nokkur stórlið í Evrópu undanfarna mánuði en ákvað að vera áfram hjá Feyenoord, að minnsta kosti eitt tímabil til viðbótar.

Undir lokin gerðu heimamenn endanlega út um leikinn með heldur klaufalegu sjálfsmarki.

Skot fór þá af varnarmanni Como og Robert Sanchez kastaði sér á eftir boltanum. Hann fór hins vegar í stöngina og þaðan í bakið á Sanchez áður en hann lak yfir marklínuna.

Afar óheppilegt hjá Spánverjanum. Como náði í sárabótarmark seint í uppbótartíma er Grikkinn Anastasios Douvikas skoraði en það var bara of seint. Lokatölur í Rotterdam, 3-2, heimamönnum í vil.

Feyenoord fagnaði þar með sínum fyrsta sigri í deildarkeppninni og er komið með þrjú stig, rétt eins og Como.

Úrslit og markaskorarar:

Feyenoord 3 - 2 Como
0-1 Assane Diao ('18 )
1-1 Gjivai Zechiel ('20 )
2-1 Anis Hadj Moussa ('52 )
3-1 Robert Sanchez ('81 , sjálfsmark)
3-2 Anastasios Douvikas ('90 )

LASK Linz 3 - 6 Liverpool
0-1 Ronald Araujo ('22 )
0-2 Bradley Barcola ('24 )
0-3 Bradley Barcola ('37 )
0-4 Jeremie Frimpong ('51 )
1-4 Robert Ljubicic ('63 )
1-5 Bradley Barcola ('66 )
1-6 Lewis Koumas ('72 )
2-6 Florian Flecker ('74 )
3-6 Florian Flecker ('77 )