Glugginn opnar á morgun en Sara Björk má ekki spila

Félagaskiptaglugginn á Íslandi opnar á morgun, 16. júlí. Þá geta innlend félagaskipti farið stax í gegn.

Leikmenn sem eru að koma erlendis frá í íslensku deildirnar geta hins vegar ekki fengið leikheimild fyrr en daginn eftir að glugginn opnar.

Kvennalið Hauka á leik á morgun, útileik gegn Keflavík í Lengjudeildinni, og er fyrrum landsliðsfyrirliðinn Sara Björk Gunnarsdóttir að fá félagaskipti frá Sádi-Arabíu. Hún fær ekki leikheimild fyrr en í fyrsta lagi á föstudag og spilar því ekki gegn Keflavík.

Upplýsingar frá KSÍ
Félög geta hafið skráningu alþjóðlegra félagaskipta í FIFA TMS fyrir opnun félagaskiptaglugga en KSÍ getur þó ekki óskað eftir alþjóðlegri leikheimild frá fyrra knattspyrnusambandi leikmanns fyrr en glugginn hefur opnað. Leikmenn sem koma erlendis frá geta því í fyrsta lagi fengið leikheimild 17. júlí 2026, að því gefnu að öll gögn séu rétt og fullnægjandi.

Fyrsti leikur Söru, ef allt gengur að óskum með leikheimildina, verður því annan föstudag, 24. júlí, þegar HK kemur í heimsókn á Ásvelli.