2. deild: Viðar Örn með fimmu - Góðir sigrar hjá Kára og Magna

Fjölnismenn komust yfir strax á 4. mínútu með marki Árna Steins Sigursteinssonar. Árni fékk boltann hægra megin í teignum og afgreiddi hann snyrtilega í fjærhornið.

Viktor Andri Hafþórsson tvöfaldaði forystuna tuttugu mínútum síðar og Fjölnir virtist kominn með góð tök á leiknum. Þá tók Viðar við.

Viðar skoraði þrennu á aðeins ellefu mínútum undir lok fyrri hálfleiks. Fyrsta markið var stórkostlegt, beint úr aukaspyrnu í slána og inn. Hann jafnaði tveimur mínútum síðar þegar hann mætti á fjærstöngina og kláraði færið örugglega.

Hann fullkomnaði þrennuna á 41. mínútu. Frosti Brynjólfsson sendi hann í gegn og Viðar lék á markvörðinn áður en hann kom boltanum í netið.

Viðar skoraði sitt fjórða mark á 58. mínútu þegar hann mætti á nærstöngina eftir hornspyrnu og stýrði boltanum inn.

Hann lét ekki þar við sitja heldur lagði upp fimmta mark Selfoss fyrir Ívan Breka Sigurðsson á 65. mínútu. Viðar slapp í gegn en renndi boltanum óeigingjarnt til hliðar á Ívan sem skoraði.

Fimmta mark Viðars kom stundarfjórðungi fyrir leikslok. Gestur Helgi Snorrason vann boltann ofarlega á vellinum og kom honum á Viðar sem þakkaði pent fyrir sig.

Viðar er kominn með nítján deildarmörk og er langmarkahæstur í deildinni. Selfoss er í öðru sæti með 32 stig en Fjölnir í því fjórða með 25 stig.

Magni vann öruggan 3-0 sigur á Kormáki/Hvöt á Grenivík. Tómas Örn Arnarson skoraði tvennu og Haukur Leo Þórðarson eitt mark. Magni er í 8. sæti með 21 stig en Kormákur/Hvöt í því sjötta með 24 stig.

Kári hafði þá betur gegn Víkingi Ó., 4-1. Skagamenn voru þremur mörkum yfir í hálfleik eftir mörk frá Sigurjóni Loga Bergþórssyni, Marinó Hilmari Ásgeirssyni og Finnboga Laxdal Aðalgeirssyni.

Marinó Hilmar skoraði sitt annað mark snemma í síðari hálfleik áður en Luis Romero klóraði í bakkann fyrir Ólsara stundarfjórðungi fyrir leikslok.

Kári er í 3. sæti með 29 stig en Víkingur Ó. í því fimmta með 25 stig.

Selfoss 6 - 2 Fjölnir
0-1 Árni Steinn Sigursteinsson ('4 )
0-2 Viktor Andri Hafþórsson ('24 )
1-2 Viðar Örn Kjartansson ('30 )
2-2 Viðar Örn Kjartansson ('32 )
3-2 Viðar Örn Kjartansson ('41 )
4-2 Viðar Örn Kjartansson ('58 )
5-2 Ívan Breki Sigurðsson ('65 )
6-2 Viðar Örn Kjartansson ('74 )
Lestu um leikinn

Magni 3 - 0 Kormákur/Hvöt
1-0 Tómas Örn Arnarson ('37 )
2-0 Tómas Örn Arnarson ('66 )
3-0 Haukur Leo Þórðarson ('90 )

Kári 4 - 1 Víkingur Ó.
1-0 Sigurjón Logi Bergþórsson ('4 )
2-0 Marinó Hilmar Ásgeirsson ('10 )
3-0 Finnbogi Laxdal Aðalgeirsson ('25 )
4-0 Marinó Hilmar Ásgeirsson ('48 )
4-1 Luis Romero Jorge ('75 )