Lúkas hélt hreinu - Norrköping stefnir hraðbyri aftur upp

U21 árs landsliðsmarkvörðurinn er fastamaður hjá varaliði Hoffenheim og hefur einnig verið hluti af markvarðateymi aðalliðsins.

Hann átti frábæran leik gegn Düsseldorf í dag, en liðið féll úr þýsku B-deildinni í vor. Þetta var fyrsti sigur varaliðs Hoffenheim á tímabilinu.

Í B-deildinni kom Jón Dagur Þorsteinsson inn af bekknum hjá Herthu Berlín sem vann Heidenheim, 4-1. Hann lék síðustu tíu mínúturnar og Hertha er komin upp í 2. sæti með fullt hús stiga.

Davíð Kristján Ólafsson var í byrjunarliði Polonia Warszawa sem tapaði 1-0 fyrir Pogon Siedlce í pólsku B-deildinni. Polonia er í 3. sæti með sjö stig en þetta var fyrsta tap liðsins á tímabilinu.

Benoný Breki Andrésson kom inn á sem varamaður hjá Stockport County sem vann Plymouth, 3-1, í fyrstu umferð ensku C-deildarinnar.

Hólmbert Aron Friðjónsson var fremstur hjá Gwangju, aðeins nokkrum dögum eftir að hafa bjargað manni úr brennandi bíl á hraðbraut í Suður-Kóreu. Gwangju tapaði leiknum 2-1 og er áfram á botninum með ellefu stig.

Jakob Gunnar Sigurðsson byrjaði hjá Hilleröd sem gerði 1-1 jafntefli við Aarhus Fremad í dönsku B-deildinni.

Ólafur Hjaltason sat allan leikinn á varamannabekk Aarhus en Ingimar Arnar Kristjánsson kom við sögu. Hann gekk til liðs við félagið frá Þór á dögunum og var að leika sinn fyrsta leik fyrir danska félagið.

Aarhus er í 5. sæti með sjö stig en Hilleröd í næstneðsta sæti með eitt stig eftir fjórar umferðir.

Ísak Andri Sigurgeirsson fékk þá fimmtán mínútur í 4-1 sigri Norrköping á Sandviken í sænsku B-deildinni. Norrköping stefnir hraðbyri aftur upp í úrvalsdeildina og er á toppnum með 41 stig, sex stigum meira en næsta lið eftir nítján umferðir.