Taplausa hrina FH-inga senn á enda?

FH er það lið í Bestu deildinni sem hefur leikið hvað flesta leiki í röð án þess að tapa. Síðasti tapleikur liðsins kom gegn ÍA þann 29. maí.

Síðan þá hefur Fimleikafélagið spilað níu leiki í deildinni, gert sex jafntefli og unnið þrjá þeirra.

Klukkan 18:00 í dag tekur liðið á móti Íslandsmeisturum Víkings. Ef litið er til síðustu viðureigna liðanna er sagan ekki hliðholl Hafnfirðingum. FH vann síðast Víking árið 2020.

Í síðustu fimmtán viðureignum liðanna, í bæði deild og bikar, hefur Víkingur unnið fjórtán þeirra og einum leik lokið með jafntefli.

Veðbankinn Epicbet hefur takmarkaða trú á FH en rúmlega fimm er í stuðul á FH sigri. Þá er 1.58 í stuðul á Víkinga.