Spánn: Atletico missteig sig í Valencia

Topplið Atletico Madrid heimsótti Levante til Valencia í eina leik dagsins í spænska boltanum.

Levante tók forystuna eftir rúman stundarfjórðung en þá tók Atletico öll völd á vellinum og komst nálægt því að jafna áður en Marcos Llorente kom knettinum í netið á 37. mínútu.

Gestirnir frá Madríd voru óheppnir að skora ekki annað mark fyrir leikhlé en síðari hálfleikurinn var talsvert jafnari.

Hvorugu liði tókst að skora eftir leikhlé og urðu lokatölur 1-1. Þetta er annað jafntefli Atletico í síðustu þremur deildarleikjum og er liðið með sex stiga forystu á Real Madrid og leik til góða.

Levante er um miðja deild, átta stigum frá fallsvæðinu og átta stigum frá Evrópusæti.

Atletico hefur verið á blússandi siglingu á tímabilinu og er með 55 stig eftir 22 umferðir, níu stigum meira en Barcelona.