Breiðablik tapaði 1-4 gegn sænska liðinu Håcken á Kópavogsvelli í kvöld og samanlagt 1-11 í einvígi þeirra í 8. liða úrslitum Evrópubikarsins.
„Alltaf svekkjandi að tapa fótboltaleik og fá fjögur mörk á sig en mér fannst frammistaðan bara mjög góð hjá okkur í kvöld. Við gáfum þeim bara tvö mörk og þetta lið þarf ekki gjöf. Með virkilega góða leikmenn og kann alveg að refsa en þvílík bæting milli leikja."
Svaraði Ian Jeffs þjálfari Breiðabliks þegar hann var spurður um leikinn.
Lestu um leikinn: Breiðablik 1 - 4 Häcken
„Leikurinn úti, við vorum að ströggla svolítið varnarlega séð, vorum svona að droppa of djúpt og ekki að ná að setja pressu á boltamann. Mér fannst við gera þetta bara virkilega vel í kvöld og mikil bæting í okkar leik á einni viku og ég er virkilega ánægður með það."
„Við breyttum aðeins í þriggja hafsenta kerfi með svona wingbacks sem höfðu leyfi til að stíga aðeins upp og það var að hjálpa okkur mjög mikið í kvöld. Það var miklu auðveldara fyrir okkur að koma hátt upp með liðið og pressa betur á þær og gekk virkilega vel."
„Fullt af góðum pressu mómentum í leiknum sem nýttust vel og svo vorum við að koma fleiri leikmönnum ofar á völlinn til að refsa þeim, skorum eitt mark og höfðum alveg fleiri tækifæri til að gera meira úr okkar sóknarleik."
„Við getum tekið það með okkur að það er ekkert lið á Íslandi svona gott (Håcken), það er bara staðreynd, þetta er bara virkilega gott lið og við erum búin að læra helling, við í þjálfarateyminu og leikmennirnir líka."
Það hefur komið fram að Breiðablik sé að leita að fleiri leikmönnum til að styrkja hópinn er eitthvað að frétta af því, eitthvað innanlands eða erlendis?
„Nei það er ekkert komið sem ég get sagt frá í viðtali, það er ekki staðfest og við erum að vinna í því og kemur í ljós með það en ekkert sem við erum að fara tilkynna á næstu dögum eða þannig."
Viðtalið í heild má sjá í spilaranum hér að ofan
