Mjólkurbikarinn: Römer innsiglaði sigur KA í sínum fyrsta leik

Ríkjandi bikarmeistarar KA eru komnir áfram eftir öruggan sigur á KFA á Akureyri í kvöld. KA var með yfirhöndina allan fyrri hálfleikinn en liðinu gekk illa að skapa sér alvöru marktækifæri.

KA náði forystunni undir lok fyrri hálfleiks þegar Eggert Gunnþór Jónsson varð fyrir því óláni að skora sjálfsmark.

Aðeins þremur mínútum síðar bætti Jakob Snær Árnason við öðru marki. Mikael Breki Þórðarson átti sendingu inn á teiginn og Jakob setti boltann í netið.

Dagbjartur Búi Davíðsson bætti við þriðja markinu þegar hann skoraði með frábæru skoti.

Marcel Römer, sem gekk til liðs við KA frá Lyngby á dögunum, kom inn á á 65. mínútu í sínum fyrsta leik. Hann gerði sér lítið fyrir og innsiglaði sigur KA. Hann skoraði eftir sendingu inn á teiginn frá Jóan Edmundson.