England: Toney aðalmaðurinn í sigri Brentford

Úlfarnir og Brentford áttust við í fyrsta leik dagsins í ensku úrvalsdeildinni. Leikurinn fór mjög fjörlega af stað þar sem nýliðarnir höfðu yfirhöndina.

Fyrsta mark leiksins kom á 28. mínútu en þá skoraði Ivan Toney úr vítaspyrnu sem hann fiskaði sjálfur. Toney öruggur á punktinum eins og svo oft áður en hann hefur tekið 16 víti á Englandi og skorað úr 15.

Toney skoraði aftur einungis mínútu seinna en VAR dæmdi markið af vegna hendi. Brentford hélt hins vegar áfram að sækja og á 34. mínútu átti Toney flottan sprett sem endaði með góðri sendingu á Bryan Mbeumo sem gat ekki annað en skorað.

Wolves sótti meira í síðari hálfleiknum en án þess að ná að ógna marki gestanna af einhverju viti. Shandon Baptiste fékk rautt spjald á 64. mínútu eftir klaufalegt brot en Brentford liðið var þétt eftir það og gaf fá færi á sér.

Með þessum sigri fer Brentford upp í 9. sæti deildarinnar með átta stig en Wolves er einungis með þrjú stig eftir fimm leiki.