Alisson sem er 25 ára gamall kostar Liverpool 75 milljónir evra og er orðinn dýrasti markvörður allra tíma.

Hann er 25 ára gamall landsliðsmarkvörður Brasilíu sem kemur til félagsins frá Roma á Ítalíu.

Hann skrifaði undir langtíma samning við Liverpool í kvöld eftir að hafa gengist undir læknisskoðun og gengið frá öðrum formsatriðum á Melwood, æfingasvæði félagsins.

„Ég er virkilega ánægður, það er algjör draumur að klæðast þessari merkilegu treyju hjá svona stóru félagi sem er alltaf að vinna,2 sagði hann eftir undirskriftina.

„Þetta er risaskref fyrir feril minn og líf mitt að verða hluti af þessu félagi og þessari fjölskyldu. Þið getið treyst á að ég mun leggja allt mitt í þetta."

Alisson hóf feril sinn hjá Internacional í heimalandinu. Hann var aðalmarkvörður Brasilíu á HM í sumar.