Spánn: Óstöðvandi Raphinha með þrennu

Sevilla tók á móti Barcelona í lokaleik dagsins í efstu deild á Spáni og skoraði Youssouf Fofana fyrsta mark leiksins með skalla af stuttu færi á 19. mínútu en Raphinha, sem er fyrirliði Barcelona, svaraði skömmu síðar.

Raphinha fékk góða sendingu úr vörninni frá Andreas Christensen og gerði mjög vel að skapa sér pláss með að leika á einn varnarmann áður en hann kláraði með marki og var staðan 1-1 í leikhlé.

Brasilíski kantmaðurinn byrjaði seinni hálfleikinn á að skalla boltann í netið eftir magnaðan undirbúning frá Lamine Yamal. Sautján mínútum síðar fullkomnaði Raphinha þrennuna með laglegri afgreiðslu eftir aðra stoðsendingu frá Yamal.

Staðan var því orðin 1-3 eftir 69 mínútur og áttu heimamenn engin svör.

Börsungar voru sterkari aðilinn nánast allan leikinn og hefðu hæglega getað skorað fleiri mörk, en gerðu ekki. Lokatölur 1-3.

Spánarmeistararnir fara inn í landsleikjahléð með fullt hús stiga eftir sjö fyrstu umferðirnar á nýju deildartímabili. Sevilla er í 5. sæti með 13 stig.

Raphinha hefur farið ótrúlega vel af stað á tímabilinu og er kominn með 14 mörk og 3 stoðsendingar í 8 leikjum í öllum keppnum.