Championship: Mistök fyrrum varnarmanns Liverpool kostuðu WBA í grannaslag

Úlfarnir unnu sinn annan deildarleik í röð þegar liðið marði 1-0 sigur á WBA í grannaslag í ensku B-deildinni í Wolverhampton í dag.

Heimamenn réðu lögum og lofum í fyrri hálfleik og sköpuðu sér fjölda færa, en Max O'Leary hélt WBA inni í leiknum. Gestirnir gerðu hins vegar lítið sem ekkert fram á við og staðan því markalaus í hálfleik.

Eitthvað hlaut að gefa sig og Úlfarnir fengu óvænta gjöf snemma í síðari hálfleik. Nat Phillips, fyrrum leikmaður Liverpool, átti skelfilega sendingu til baka sem Fer Lopez komst inn í og setti boltann í netið.

WBA færði sig aðeins framar eftir markið en náði ekki að skapa sér nægilega góð færi og Úlfarnir héldu út og fögnuðu 1-0 sigri.

Úlfarnir eru í 4. sæti með 14 stig, en WBA situr í sætinu fyrir neðan.