Lengjudeildin: Afturelding skoraði sjö

Botnlið Ægis tók á móti toppbaráttuliði Aftureldingar í fyrri leik kvöldsins í Lengjudeild karla og sást gæðamunur liðanna augljóslega.

Bart Kooistra skoraði fyrsta mark leiksins á 33. mínútu og tvöfaldaði Joacim Holtan muninn úr vítaspyrnu skömmu fyrir leikhlé.

Gestirnir úr Mosfellsbæ gerðu út um einvígið á sex mínútna kafla í upphafi síðari hálfleiks. Haukur Örn Brink, Joacim Holtan og Axel Óskar Andrésson komust allir á blað með stuttu millibili svo staðan var orðin 0-5.

Róbert Agnar Daðason kom inn af bekknum skömmu eftir fimmta markið og bætti tveimur við á lokakaflanum, svo lokatölur urðu 0-7.

Afturelding endurheimtir toppsæti deildarinnar með þessum sigri. Mosfellingar eru með 39 stig eftir 19 umferðir, tveimur stigum fyrir ofan Þrótt R. í titilbaráttunni.

Afturelding á framundan heimaleiki við Gróttu og Vestra í tveimur af síðustu þremur umferðum deildartímabilsins, áður en liðið heimsækir Njarðvík í lokaumferðinni.