Lengjudeildin: Bragi Karl og Diouck gengu frá Völsungi

Njarðvík vann öruggan sigur á Völsungi í Lengjudeildinni í dag. Njarðvíkingar vildu fá tvö víti snemma leiks. Það kom ekki að sök því Bragi Karl Bjarkason kom liðinu yfir eftir stundafjórðung.

Bragi Karl skoraði eftir mikinn darraðadans inn á teignum þar sem vörn Völsungs kom í veg fyrir tvö skot áður en Bragi náði að koma boltanum í netið.

Oumar Diouck bætti síðan öðru markinu við þegar skot hans fór af varnarmanni og í netið.

Bragi Karl bætti síðan öðru marki sínu við og þriðja marki Njarðvíkur með glæsilegu skoti vel fyrir utan vítateiginn eftir sendingu frá Diouck.

Bragi þakkaði síðan fyrir sig og lagði upp fjórða markið á Diouck sem skallaði boltann í netið og innsiglaði sigur Njarðvíkinga.

NJarðvík er í 5. sæti með 35 stig en Völsungur er í 11. sæti með 20 stig, stigi frá öruggu sæti.