Það er óvíst hvort Salah verði með
Alisson er frá í mánuð
Óvíst er hvort Darwin Nunez, Mohamed Salah og Dominik Szoboszlai verði klárir fyrir leik Liverpool og Chelsea í úrslitaleik enska deildabikarsins á sunnudag, en þetta sagði Pep Lijnders, aðstoðarþjálfari Liverpool, á blaðamannafundi í dag. Fjórir leikmenn liðsins verða þá frá næsta mánuðinn.
Leikmennirnir voru ekki með Liverpool í 4-1 sigrinum á Luton á dögunum, en allir eru að glíma við smávægileg meiðsli.
Vonast var eftir frekari upplýsingum á blaðamannafundinum í dag en Lijnders var þögull sem gröfin.
„Við verðum að bíða og sjá með Dominik, Darwin og Mo. Við höfum tvo daga. Við munum æfa í dag og á morgun, þannig við munum athuga hvort þeir geti verið viðstaddir. Ef ég á að vera hreinskilinn þá væri það frábært,“ sagði Lijnders er hann var spurður hvort þeir gætu verið með á sunnudag.
Lijnders staðfesti þá að þeir Diogo Jota, Trent Alexander-Arnold, Curtis Jones og Alisson yrðu frá næsta mánuðinn.
„Alisson verður frá alveg þangað til eftir landsleikjatörnina vegna vöðvameiðsla. Curtis Jones tognaði á ökkla og er sama staða á honum. Liðsbandsmeiðsli í ökkla hjá Trent og í hné Jota. Ég segi eftir landsleikjatörn þar sem við erum ekki alveg klárir [á tímarammanum],“ sagði Lijnders.
Þetta er gríðarlegt högg fyrir Liverpool, sem er enn inn í öllum keppnum. Liverpool er á toppnum í deildinni, komið í 16-liða úrslit Evrópudeildarinnar, úrslitaleik deildabikarsins og 16-liða úrslit enska bikarsins.
Athugasemdir
