Björn Berg Gunnarsson, framkvæmdastjóri KV.
Aðstaðan við heimavöll KV stenst ekki kröfur í 1. deild.
KV komst upp í 1. deild um helgina.
„Ætli stærsta áskorunin hjá þeim verði ekki að uppfylla kröfur varðandi yngri lið," segir Ómar Smárason, starfsmaður KSÍ, varðandi Knattspyrnufélag Vesturbæjar, KV, sem komst upp í 1. deild um helgina.
Til að fá þátttökurétt í 1. deild þarf að standast kröfur leyfiskerfis Knattspyrnusambandsins. Þar er meðal annars gerð krafa um að félag sé með a.m.k. fjögur unglingalið en þá grein má sjá neðst í fréttinni.
KV er ekki með neitt yngri flokka starf en í leyfiskerfinu er einnig talað um að leyfisumsækjandinn verður að vera með skriflega áætlun um knattspyrnulegt uppeldi frá 9 ára aldri sem KSÍ hefur samþykkt.
Einnig þarf heimavöllur KV að standast ákveðnar kröfur en liðið hefur frá stofnun spilað á gervigrasvelli KR. Félagið getur fengið undanþágu til að leika þar áfram ef lögð verður fram framkvæmdaáætlun um það hvernig eigi að láta völlinn standast leyfiskerfið og hvernig fjármagna eigi þær framkvæmdir.
Þarf enginn að hafa áhyggjur
Fótbolti.net hafði samband við Björn Berg Gunnarsson, framkvæmdastjóra KV, og spurði út í hvernig félagið hygðist bregða við kröfum leyfiskerfisins.
„Við höfum verið að fagna um helgina og það sem við förum í núna er að skoða þessi mál. Það þarf enginn að hafa áhyggjur. Við erum rosalega metnaðarfullir og störfum faglega. Það eru fleiri mánuðir í að þetta hefjist og við munum leysa þetta með KSÍ. Við höfum engar áhyggjur," segir Björn.
„Umræðan í borginni er öll um það að sameina eigi íþróttafélög. Ef það á að gera kröfur um að þriðji aðilinn komi inn með yngri flokka í samkeppni við KR og Gróttu er það algjörlega galið. Ég hef ekki nokkra trú á öðru en að þetta verði bara leyst í sameiningu með KSÍ."
Hinn nýi fótbolti á Íslandi
„Mörg félög hafa verið á undanþágum frá þessu leyfiskerfi í fleiri ár. Leyfiskerfið má ekki verða til þess að það haldi íslenskri knattspyrnu í fortíðinni. Íslensk knattspyrna er að breytast. Á sínum tíma voru öll lið sem tóku þátt með yngri flokka þar sem þetta voru þau félög sem áttu velli. Þannig var staðan. En með tilkomu gervigrasvallana þá hefur þátttaka í meistaraflokksfótbolta aukist alveg gríðarlega. KSÍ hlýtur að fagna því rétt eins og við."
„Það eru komin mörg ný lið og þetta er bara hinn nýi fótbolti á Íslandi. Það eru bæði lið sem hafa öflugt yngri flokka starf og mikla yfirbyggingu en líka lið sem eru ekki með það. Það fagna því allir að svona lið séu til og þau nái árangri," segir Björn.
„KV er lið sem er að fara upp í 1. deildina eingöngu á leikmönnum sem hafa gaman að því að spila fótbolta og vera vinir. Menn vilja spila skemmtilegan fótbolta og hafa gaman. Klúbbur eins og við gerum þetta af 100% metnaði og gerum allt sem við getum til að þetta verði frábært tímabil. KSÍ á að vinna fyrir aðildarfélögin og auðvitað vinnum við þetta með þeim."
Úr leyfiskerfi KSÍ.
Athugasemdir
