Ída Marín lagði upp í góðum sigri - Misjafnt gengi hjá systrunum

Aðeins nokkrar vikur eru síðan Ída kom til Hammarby frá FH, en hún hefur ekki þurft langan aðlögunartíma og er strax komin í stórt hlutverk hjá liðinu.

Hún skoraði þrennu í sænska bikarnum og fylgdi því eftir með marki í fyrsta deildarleiknum. Þá lagði hún upp mark í sínum fyrsta Evrópuleik með Hammarby.

Ída lagði upp fyrir Elin Sorum á 29. mínútu og lék í 70 mínútur, en Guðrún Arnardóttir stýrði varnarlínu Hammarby.

Liðið bætti við öðru marki undir lokin og fer því með góða stöðu til Skotlands.

Gengið var misjafnt hjá systrunum Hlín og Örnu Eiríksdætrum. Hlín byrjaði í 2-0 útisigri á St. Polten á meðan Arna var í vörn Vålerenga sem tapaði 4-1 fyrir Feyenoord í Hollandi. Fanney Inga Birkisdóttir var í marki Vålerenga.

Alexandra Jóhannsdóttir skoraði fyrsta mark Kristianstad í 8-0 stórsigri á Värnamo í sænska bikarnum. Sigurinn tryggði liðinu sæti í riðlakeppni bikarsins sem fer fram á næsta ári.

Ásamt Alexöndru voru þær Elísa Lana Sigurjónsdóttir og Guðný Árnadóttir einnig í byrjunarliðinu. Nik Chamberlain er þjálfari Kristianstad, en hann stýrði áður Breiðabliki og Þrótti hér heima áður en hann tók við sænska liðinu á síðasta ári.