AC Milan, AS Roma, Como og Juventus eru að berjast um síðustu tvö Meistaradeildarsætin en hin tvö liðin fara í Evrópudeildina. Eins og staðan er núna eru Milan og Roma með tveggja stiga forskot.

Milan tekur á móti Cagliari á meðan Roma heimsækir fallið lið Verona, á sama tíma og Juventus spilar nágrannaslag við Torino og Como heimsækir fallbaráttulið Cremonese.

Cremonese er eini andstæðingurinn sem er að keppa upp á eitthvað, að undanskildu liði Torino sem þráir eflaust ekkert heitar en að enda tímabilið á því að eyðileggja möguleika nágranna sinna.

Cremonese er í harðri fallbaráttu við Lecce og þarf helst á sigri að halda en gæti nægt jafntefli til að eiga möguleika á að forðast fall. Lecce er einu stigi fyrir ofan og tekur á móti Genoa í mögulegum Íslendingaslag.

Þórir Jóhann Helgason hefur aðeins komið við sögu í fjórum leikjum á árinu með Lecce, heima- og útileikjum gegn stórveldum Juventus og Roma. Mikael Egill Ellertsson er fastamaður í byrjunarliði Genoa.

Ef tvö lið enda jöfn á stigum þá eru það innbyrðisviðureignir sem telja. Þar hefur Cremonese yfirhöndina í fallbaráttunni þrátt fyrir að vera stigi á eftir en í Meistaradeildarbaráttunni er Milan best sett í innbyrðisviðureignunum.

Milan hafði betur í innbyrðisviðureignum gegn Roma og Como en gerði jafntefli við Juventus. Como hafði betur gegn Juve og gerði jafntefli við Roma á meðan Juve hafði betur gegn Roma.

Leikir dagsins
13:00 Parma - Sassuolo
16:00 Napoli - Udinese
18:45 Cremonese - Como
18:45 Verona - Roma
18:45 Lecce - Genoa
18:45 Milan - Cagliari
18:45 Torino - Juventus