Kristall: Ætla að sjá til þess að Freysi dansi ekki í lok tímabils

„Við komumst áfram í Sambandsdeildinni, það hefur verið meira bras í deildinni. Ég veit ekki hvað það er en við náum ekki upp alveg sömu stemningu og í Evrópu. Það hafa verið meiðslavandræði, meðal annars Sævar Atla sem var loks að koma til baka í síðasta leik. Við þurfum að fá leikmenn til baka og þá erum við með drullusterkt lið."

Skoraði og fékk rautt
Kristall skoraði í 2-1 sigri gegn Bodö/Glimt um síðustu helgi en fékk svo rautt spjald eftir VAR skoðun. Liðsfélagar hans náðu að landa sigrinum þrátt fyrir liðsmuninn og Kristall segir það hafa verið létti.

„Þeir sýndu þvílíkan karakter. Við höfum fengið einhverja gagnrýni fyrir að varnarleikurinn sé ekki nógu góður en ef þú nærð að halda út í 20-30 mínútur tíu gegn Meistaradeildarliði Bodö/Glimt þá ertu að gera eitthvað rétt. Þetta var geggjað."

Hvað með rauða spjaldið, var það réttur dómur?

„Nei, þetta var mjög 'soft'. Hann kemur þarna fyrir mig og ég enda á því að taka hann niður."

TENGT EFNI20.09.26 - 21:00

Sjáðu mörk Íslendinganna og rauða spjald Kristals í frábærum sigri Brann

Íslendingarnir gera allt fyrir liðið
Auk Kristals eru Sævar Atli Magnússon, Eggert Aron Guðmundsson og Kjartan Már Kjartansson hjá Brann. Íslendingasamfélagið hjá félaginu er að stækka og þéttast.

„Þeir sjá að Íslendingarnir gera allt fyrir liðið og fyrir klúbbinn. Menn eins og Eggert, Sævar, ég og Kjartan núna pottþétt reynum að spila alla leiki þó það sé eitthvað að hrjá okkur. Við reynum að púsla okkur saman til að hjálpa liðinu. Við spilum meiddir og gerum allt fyrir liðið, stuðningsmennirnir sjá það og þá halda þeir með okkur," segir Kristall.

Hann má dansa eins og hann vill
Freyr Alexandersson fékk Kristal til Brann en hann var síðan rekinn frá félaginu og hefur nú rifið Rosenborg rækilega í gang. Rosenborg er í fimmta sæti, fjórum stigum á undan Brann.

„Já því miður, hann er búinn að ná að kveikja aðeins í þessu og það er bara flott fyrir hann. Ég dýrka Freysa og held með honum en vonandi dettur þetta aðeins niður hjá honum svo við náum þessu fjórða sæti, allavega það," segir Kristall.

Freyr hefur fagnað góðum árangri með því að dansa fyrir stuðningsmenn sem eru ánægðir með danssporin. Þetta hefur vakið mikla athygli í Noregi.

„Hann má dansa eins og hann vill. Ég ætla að sjá til þess að Brann endi fyrir ofan Rosenborg. Þetta verður bara stríð um fjórða sætið og vonandi verður hann ekki dansandi í lok tímabils."