Þjóðadeildin: Vonbrigði á Laugardalsvelli

Ísland fékk Eistland í heimsókn í fyrsta leiknum í C-deild Þjóðadeildarinnar í dag. Búist var við þægilegum sigri Íslendinga en raunin varð önnur.

Íslenska liðinu gekk till að skapa sér færi í fyrri hálfleiknum. Ísland varð fyrir áfalli eftir hálftíma leik þegar Albert Guðmundsson þurfti að fara af velli vegna meiðsla. Hann lenti í samstuði og lenti mjög illa á öxlinni.

Eistar fengu dauðafæri stuttu síðar en Hákon Rafn Valdimarsson varði stórkostlega.

Ísland náði forystunni undir lok fyrri hálfleiks þegar Andri Lucas Guðjohnsen skallaði boltann í netið eftir hnitmiðaða fyrirgjöf frá Hákoni Arnari Haraldssyni.

Eistar komu sterkir út í seinni hálfleikinn og Hákon Rafn þurfti aftur að taka á stóra sínum. Eistar fengu síðan vítaspyrnu og Hákon gerði sér lítið fyrir og varði hana.

Eistum tókst að jafna metin eftir rúmlega klukkutíma leik þegar Maksim Paskotsi skallaði boltann í netið eftir fyrirgjöf frá Rasmus Peetson.

Kristall Máni Ingason fékk úrvalsfæri til að koma Íslandi yfir í lokin. Það kom sending inn á teiginn, Ísak Snær Þorvaldsson lét boltann fara. Hann barst á Kristal en skotið beint á Karl Hein í marki Eistana.

Orri Steinn fékk allra síðasta færið en skallinn slakur og beint á Hein. Nær komust Íslendingar ekki og vonbrigða jafntefli niðurstaðan.