Slagsmál eftir leik og ráðist á Guendouzi

Tyrkneska liðið Fenerbahce er komið í Meistaradeildina en liðið hafði betur gegn Lyon í Frakklandi, 2-1, og vann einvígið samanlagt 3-2. Það var mikill hiti meðan á leik stóð og allt sauð upp úr eftir hann.

Stormurinn var í kringum Matteo Guendouzi, franskan miðjumann Fenerbahce, en hann er fyrrum leikmaður erkifjendanna í Marseille og er ekki vinsæll meðal stuðningsmanna Lyon.

Guendouzi fékk að heyra það úr stúkunni allan leikinn, það var baulað á hann og sjálfur segir hann að mjög ljót orð hafi verið látin falla um sig og sína nánustu. Guendouzi svaraði meðal annars með því að sýna áhorfendum miðfingurinn og eftir sigur Fenerbahce fagnaði hann ákaft fyrir framan stúkuna.