Atletico gerði 2-2 jafntefli gegn Bayer Leverkusen á heimavelli sínum í gær. Franski vængmaðurinn Moussa Diaby kom Leverkusen yfir á 9. mínútu áður en Yannick Carrasco jafnaði metin þrettán mínútum síðar.

Callum Hudson-Odoi kom Leverkusen aftur í forystu á 29. mínútu en Rodrigo de Paul jafnaði strax í upphafi síðari hálfleiks.

Lokamínútur leiksins voru heldur betur dramatískar en þegar níu mínútur voru komnar í uppbótartíma fékk Atlético vítaspyrnu er varnarmaður Leverkusen handlék knöttinn. Carrasco fór á punktinn en Lukasz Hradecky sá við honum.

Í kjölfarið á vörslunni náði miðjumaðurinn Saul frákastinu en hann skallaði boltann í slána. Aftur náði Atletico frákastinu, það var varnarmaðurinn Reinildo. En einhvern veginn tókst Leverkusen að bjarga á línu.

Eftir þetta jafntefli var það ljóst að Club Brugge og Porto færu upp úr riðlinum, en Atletico og Leverkusen sitja eftir. Leikmenn Porto sáu lokamínúturnar í leik Atletico og Leverkusen um borð í flugvél á leið til Porto eftir sigur sinn á Club Brugge í Belgíu.

Hægt er að sjá myndband af lokasekúndunum í Madríd og fagnaðarlátum leikmanna Porto hér fyrir neðan.