Fulham vann Wolves, 3-2, í lokaleik þrettándu umferðar ensku úrvalsdeildarinnar á Craven Cottage í kvöld. Michael Salisbury og VAR-teymið dæmdi þrjár vítaspyrnur í síðari hálfleik.

Heimamenn byrjuðu betur og komust í forystu með marki Alex Iwobi á 7. mínútu. Antonee Robinson skiptist á sendingum með Willian áður en hann fann Iwobi, sem skoraði.

Matheus Cunha jafnaði metin fyrir Wolves fimmtán mínútum síðar með skalla eftir frábæra sókn Úlfanna.

Snemma í síðari hálfleiknum fengu Fulham-menn ódýra vítaspyrnu. Tom Cairney féll í teignum eftir viðskipti sín við Nelson Semedo, en af endursýningunni að dæma þá fór Semedo fyrst í boltann, en vítaspyrna engu að síður dæmd. Willian skoraði úr vítinu.

Sextán mínútum síðar fengu Úlfarnir vítaspyrnu er Tim Ream tók niður Hee-Chan Hwang á vítateigslínunni. Hann tók spyrnuna sjálfur og jafnaði leikinn.

Dramatíkinni var ekki lokið. Undir lok leiks braut Joao Gomes á Harry Wilson í teignum og þriðja vítaspyrnan dæmd. Willian fór aftur á punktinn og gerði annað mark sitt og sigurmark leiksins.

Fulham er í 14. sæti með 15 stig, jafnmörg stig og Úlfarnir sem eru í 12. sæti.