3. deild: Sandgerðingar opnuðu titilbaráttuna upp á gátt

Reynir Sandgerði vann afar dýrmætan 2-1 sigur gegn Víði í toppslag 3. deildar karla í gær.

Víðismenn hefðu með sigri nánast tryggt sér sæti í 2. deild en Reynismenn höfðu önnur áform. Gestirnir byrjuðu betur og Ísak John Ævarsson kom þeim yfir á 19. mínútu. Sú forysta hélt allt þar til korter var eftir.

Eyþór Örn Eyþórsson jafnaði fyrir Reyni á 75. mínútu og innan við mínútu síðar sneri Jordan Smylie leiknum við með sigurmarkinu.

Reynir saxaði því á forskot Víðis á toppnum og er nú með 39 stig í öðru sæti, þremur stigum á eftir toppliðinu þegar tvær umferðir eru eftir.

Úrslitin opna einnig dyrnar fyrir KH og Tindastól í titilbaráttuna. Bæði lið eru með 38 stig, en þau mætast á Sauðárkróksvelli á laugardag.